Lokahátíð upplestrarkeppninnar

Í gærkvöldi var haldin í Tónbergi lokahátíð Upplestrarkeppni grunnskólanna á Akranesi. Þar var boðið upp á upplestur 12 nemenda úr 7. bekkjum Brekkubæjarskóla og Grundaskóla. Að auki flutti Valdís Marselía Þórðardóttir ávarp, flutt var tónlistaratriði nemenda úr Tónlistarskóla Akraness og Zeina Carla Al-Jeber, nemandi úr 7. bekk Grundaskóla, las upp ljóð á arabísku.

Dagur íslenskarar tungu, 16. nóvember, markaði upphafið að upplestrarkeppninni. Þá hófst ferlið formlega og alllir nemendur 7. bekkjar tóku til við æfingar á upplestri texta í bundnu og óbundnu máli. Í byrjun mars voru haldnar undankeppnir í grunnskólunum og 6 bestu lesararnir úr hvorum skóla valdir til að lesa á lokahátíðinni.

Lesefnið sem lá til grundvallar á lokahátíðinni samanstóð af texta úr bókinni Draumurinn eftir Hjalta Halldórsson, náttúruljóðum eftir ýmsa höfunda, og ljóðum sem krakkarnir völdu sjálfir. Þriggja manna dómnefnd fékk síðan það krefjandi verkefni að velja besta lesarann úr hvorum skóla fyrir sig. Dómnefndina skipuðu þau Hallbera Jóhannesdóttir, Jakob Þór Einarsson og Þóra Grímsdóttir.

Allir þátttakendur stóðu sig með stakri prýði og eiga mikið hrós skilið fyrir frábæra frammistöðu. Niðurstaðan varð þó sú að Sigrún Inga Sigþórsdóttir var valin upplesari Brekkubæjarskóla og Daði Rafn Reynisson upplesari Grundaskóla.

Einnig voru afhentar viðurkenningar fyrir teikningar á boðskort sem var sent á gesti hátíðarinnar. Það voru þau Helga Lind Viðarsdóttir og Rúnar Berg Vattar Hjartarson sem fengu þær viðurkenningar.

Myndir frá lokahátíðinni má sjá með því að smella hér.